رحل الشهيد اوكير عن دنيا تاركاً ذكريات واثر جميل جدا في كثير ين طيب الله ثراه , وكما قال الشاعر محمد الحسن سالم حميد ايه الدنيا غير لمة ناس في خير او ساعة حزن
في بوست قديم على مجموعة معا لنحافط على الجامعة قبل وفاة دكتور اوكير بسنين بتاريخ٢٣ نوفمبر ٢٠١8 , حاز البوست على تفاعل واسع اذ حصد ثلاثمائة واثني تعليق (392 ) نروي بعض منها
صاحب البوست هدي الرشيد , سالت ﻻناس اسكووول… دكتور اوكير الماحضر محاضرتو منو والسقط في امتحانو منو بي صراااحه 🤣🤣🤣
افتتحت الردود تسابيح محمد جكسا هو فى زول بتجرا يدوك لاوكير الاتيندنس بالبنش اهم شئ بجى مقطع الورق جااهز كل محاضرة .
قالت بت الفردوس الشيخ ياخ مرة ندهني كنت جايبه 18من 20في مدتيرم ولا تست ماعارفه وقتها كانت فرحه لاتوصف وشرحو ممتع ومنظم نظام غير عادي
الاء محمود د. اوكير شخصية لا تنسي صاحب فضل كبير علي ربنا يرحمه ويغفر ليه كان اول ميد تيرم اسقط فيه في حياتي حقو منها ركزت في قرايتي لحدي اخر سنة في الجامعة
سماح مهدي انا بتذكر في أعمال السنة من 5 فانا جبت 1 ونص فزعلت شديد فلقيت ناس جايبين ربع وناس تلاته ارباع فرحت فرح 😂😂
لينا عاصم انا جبال ٢ ونص واكبر درجة كانت عبير ٣ درجات من ٥
الاء البديري الغريبة كنت منتظمة في الحضور والكتابة ونحجت نجاح محترم في مادته كان بياخد اتندنس ولا شنو؟
الاء محمد عليكان بصحح بربع الدرجة ونص الدرجه وبي خطوات، الحمد لله درسني ٤ مواد كلها نجحت فيها ومره جبت بي
, ربنا يرحمه بواسع رحمته ويجعل الجنة مثواه.
عبير الدويحي الحمدلله نجحت .. الظريفه درسنا في تانيه معادلات تفاضليه في الامتحان السؤال الاخير حليتو غلط ونسيت القصه جا لاقاني في سنه رابعه في الحوش قام ناداني قال لي كيف تشتغلي المساله غلط وقعد يشرح لي قلت لي انا زاتي مامتذكراها والله 🤣 واضافات عبير لاحقا قصص تدمي القلب الا رحمة الله عليك استاذنا والا لعنة الله على الجنجويد ومن شايعهم ومن ايدهم
دخل بروف شريف بابكر على البوست معلقا
كان زعلان من انو الطلاب ما بيتفقدو زملائهم لما يغيبو من المحاضرات. مرة لاحظ انو طالبة غابت من المحاضرة و الطالبة دى مواظبة جدا. طلع من المحاضرة مشى مكتب المسجل شال نمرة تلفونها. اتصل على الرقم ردت عليهو ام البت.. اتضح انو البت كانت مريضة و راقدة فى المستشفى. طلع من الجامعة و اتجه لزيارة البت فى المستشفى.واضاف بروف بابكراحكى ليكم حاجة واحدة فقط عن وفاء د اوكير لاصدقائه:زرتو مرة الصباح فى مكتبو. لقيتو مغبر و هدومو جايطة. قلت ليهو مالك الليلة ؟ الحاصل شنو؟ ضحك ضحكتو المميزة ديك… قال لى جاى من سفر. كنت فى الجزيرة. المهم… ابراهيم اوكير عدى ليهو فترة فى السعودية. قال لى كان فى واحد صاحبو بيجيهو بعد كل كم يوم فى رمضان و بيجيب ليهو طبيخ و حاجات زى دى.. نظام لانو ابراهيم قاعد براو. الحصل انو الشخص دا اتوفى الى رحمة الله. قال لى ابراهيم بعد كل فترة لما يتذكر صاحبو دا بيسافر ابراهيم الى قرية صاحبه ذاك و يبيت فى المسجد (المسيد) و فى الصباح يرجع للخرطوم. و عندما سالته ليه ما بيبيت مع اهل صاحبو دا؟ ضحك مرة اخرى و قال لى اصلا اهلو زاتهم ما عارفين عنى حاجة.كان مفروض يرسل لى من الخرطوم حاجات مع مها زوجتى و هى راجعة من الخرطوم الى لندن. و الطيارة مواعيدها بالليل. المهم جا مطار الخرطوم و سلمها الوصية. و رجع مع قريبنا الكان وصلها المطار. د اوكير قال لقريبنا توصلنى الجامعة لانو انا عندى محاضرة و لو مشيت البيت حا اتاخر على المحاضرة. قريبنا نزلو فى الجامعة و كانت الساعة زى 3 صباحا.ما تنسو انو د اوكير بالرغم من انو درس بجامعة الخرطوم الا انو اتعين ضمن المجموعات الاولى بجامعة الجزيرة. و ابتعثته جامعة الجزيرة للماجستير اولا ثم الدكتوراة لاحقا.. و عمل بجامعة الجزيرة لسنوات طويلة بعد عودته من الدكتوراه فى عام 1993…. و انتقل لجامعة الخرطوم لاحقا..و ناس جامعة الجزيرة يكنون له الكثير من الود و الاحترام تماما مثل طلاب و اساتذة جامعة الخرطوم.
دكتور زكريا محمد صالح
اسكول لم تكن اسكول التي نعرف لولا د اوكير وأمثاله. رجل موسوعة له نكهته الخاصة يفيض علما وإنسانيةكان لي شرف الدراسة على يديه (رغم ما فيها من مطبات ههههه) – جبر خطي، دوال في عدة متغيرات، طرق رياضية و دوال خاصة.
يتبع باذن بحكاوى وتعليقات طلاب اسكول , في المقالات القادمة حب دكتور اوكير رحمه الله لناس اللعوت , و حكاية الدرجة فاي , وبت اسكول البتوسيها امها وبتسالها اه السنة دي عندكم اوكير وغيرها الكثير من حكاوي اوكير